సీఎం రేవంత్ చొరవతో వరంగల్ యువతికి హోంశాఖలో కొలువు

వరంగల్ జిల్లాకు చెందిన ఒక యువతి 19 ఏళ్లుగా సాగించిన సుదీర్ఘ పోరాటానికి ముఖ్యమంత్రి రేవంత్ రెడ్డి చొరవతో ముగింపు లభించింది. న్యాయమైన డిమాండ్‌తో నిరీక్షిస్తున్న ఆ యువతికి తన ద్వారా పరిష్కారం లభించడం ఎంతో సంతోషాన్నిచ్చిందని ముఖ్యమంత్రి రేవంత్ రెడ్డి స్వయంగా వెల్లడించారు. ఈ మేరకు ఆయన తన అధికారిక ఎక్స్ ఖాతాలో వివరాలను పంచుకున్నారు.

వివరాల్లోకి వెళితే, వరంగల్‌కు చెందిన హెడ్ కానిస్టేబుల్ బి. భీం సింగ్ 1996లో విధి నిర్వహణలో భాగంగా జరిగిన ఒక ఎన్‌కౌంటర్‌లో మరణించారు. ఆయన మరణానంతరం, ఆయన కుమార్తె బి. రాజశ్రీ కారుణ్య నియామకం కింద తనకు న్యాయం చేయాలని గత 19 సంవత్సరాలుగా ప్రభుత్వ కార్యాలయాల చుట్టూ తిరుగుతూ పోరాడుతున్నారు.

ఈ విషయం ముఖ్యమంత్రి రేవంత్ రెడ్డి దృష్టికి రావడంతో ఆయన వెంటనే స్పందించారు. కారుణ్య నియామకం కింద రాజశ్రీకి హోం శాఖలో జూనియర్ అసిస్టెంట్‌గా ఉద్యోగం కల్పిస్తూ ఉత్తర్వులు జారీ చేయించారు. దీంతో రాజశ్రీ కుటుంబంలో ఆనందం వెల్లివిరిసింది.

ఈ సందర్భంగా రాజశ్రీ ముఖ్యమంత్రి రేవంత్ రెడ్డిని కలిసి తన ఆనందాన్ని పంచుకున్నారు, కృతజ్ఞతలు తెలిపారు. ఆమెకు ఉద్యోగ నియామక పత్రాన్ని సీఎం అందజేశారు. ఈ సమస్యను తన దృష్టికి తెచ్చి, పరిష్కారంలో కీలక పాత్ర పోషించిన వర్ధన్నపేట శాసనసభ్యుడు కె.ఆర్. నాగరాజుకు ముఖ్యమంత్రి రేవంత్ రెడ్డి ప్రత్యేక అభినందనలు తెలియజేశారు.